MAMBO MADOGO YENYE THAMANI KUBWA KWENYE MAPENZI!

KUNA mambo ambayo yanaweza kuonekana ya kawaida tu au si ya lazima sana lakini kumbe yana uzito na thamani kubwa sana kwenye uhusiano. Wengi wakitaka kufanya jambo la kumfurahisha mpenzi wake, huwaza katika ukubwa.

Wapo wanaofikiri labda kwa kutoka na mwezi wake kwenda naye kwenye hoteli kubwa ya kifahari ya nyota tano na kulala kwa usiku mmoja lina thamani kubwa. Pengine wapo wanaofikiri kuwa, kuwanunulia wenzi wao vitu vya thamani kubwa kama cheni ya dhahabu, gari nk ndivyo vyeny

e thamani pekee!

Si kweli. Ni ukweli usio na shaka kwamba, mwanamke anapenda kufanyiwa vitu vyenye thamani na mwanaume wake. Ukweli unabaki kuwa, wakati mwingine unaweza kuwa unatamani kumfanya mwenzi wako awe na furaha muda wote lakini mfuko wako ukawa hauruhusu!

Hulka ya wanawake wengi ni kutamani kuona mwenzi wake anamuona ni mtu muhimu na anakuwa naye karibu muda wote. Wanawake hawajali sana vitu vya thamani kama wanaume wanavyofikiri.

Kumkumbatia mwanamke na kumbusu katikati ya midomo yake, ukisindikiza na maneno matamu ni zaidi ya gari utakalomnunulia – kikubwa hapa, mwanamke huyo awe kweli ana upendo nawe na si kuwa yupo kibiashara!

Katika mada hii, nimekuandalia vitu vichache ambavyo kwa hakika, kwa mujibu wa utafiti nilioufanya, ni ‘sumu’ kwa wanawake. Ukifanya vyote au sehemu yake, unamfanya mwanamke wako ajihisi yupo katika mikono salama.

Bado thamani ya mali na vitu vingine vitabaki katika uhalisia wake, lakini kwa hakika mambo yafuatayo hapa chini, huwachanganya sana wanawake.

KADI

Ni utaratibu ulizoeleka sana kipindi cha nyuma kidogo. Sasa hivi teknolojia imeongezeka, kadi inaweza kupatikana hata kwenye mitandao mbalimbali ya internet. Hata hivyo, bado inaonekana kuwa mwanamke anapenda na anatamani kuona mwanaume wake anamkumbuka kwa kumtumia kadi.

Wanaume wengi ni wavivu, lakini kwa sababu ya ustawi wa penzi lako, jaribu hili. Nunua kadi yako yenye ujumbe mzuri, andika maneno mengine kwa mkono wako mwenyewe, pulizia manukato unayotumia, kisha mtumie / mpelekee mpenzi wako. Utakuwa umemroga!

NYIMBO, MASHAIRI

Wanawake wanapenda sana kufahamu kuwa kweli alipo anapendwa. Nyimbo nzuri za mapenzi ambazo zitaeleza uzuri wake na namna unavyompenda na kumthamini, vinazidi kukuweka katika kilele cha umiliki uliotukuka.

Mchagulie mpenzi wako wimbo redioni, taja jina lake, lako na ujumbe wako. Utamfanya ajisikie fahari sana. Mashairi katika magazeti mbalimbali na majarida pia huongeza ladha ya mapenzi.

Anachojali mwanamke ni ile hali ya kuona kuwa, unampenda na unaweza kuthibitisha hilo hata mbele ya watu wengine. Kusikia akitajwa redioni au amendikwa gazetini ukionyesha hisia zako za kumpenda, kutamchanganya na kumfunga kabisa hisia za kufikiri kukusaliti.

Tatizo wanaume wengi hawatilii maanani haya mambo lakini kama unataka kuwa dume la mbegu kwa mwanamke wako, jaribu uchawi huu.

UJUMBE WA MAHABA

Kumtumia mpenzi wako au mkeo ujumbe wa mahaba ni sehemu ya kumwongezea ‘uchizi’ katika penzi lenu. Wengi hawapendi na pengine hawawezi kutunga. Siku hizi mambo ni rahisi sana, magazeti mengi yanaandika Love Messages.

Achana na magazeti hata baadhi ya kampuni za simu hufanya hivyo. Kopi kisha pesti – mtumie. Utaona atakavyozidi kukupaisha kithamani katika maisha yake.

MITANDAO YA KIJAMII

Siku hizi kuna mitandao mingi ya kijamii. Kwa bahati mbaya, baadhi ya watu huitumia vibaya na kuanzisha uhusiano usiofaa huko. Wanawake wengi huwa hawana amani na wanaume zao hata kama kwenye maelezo yao ya utambulisho wameandika wameoa au wana wachumba.

Kuweka picha yake mara chache au maneno ya kuonyesha unavyompenda, huziba hisia zake mbaya na kujiona yuko na mwanaume huru na makini. Jaribu utaona ukweli wa ninachokisema.

KUWA HURU NAYE

Wanaume wengi hawapendi mahaba, lakini asikudanganye mtu, kuongozana na mwenzi wako, huongeza msisimko na kumfanya azidi kuwa huru na mwenye kujiamini. Usimwogope, mshike mkono, tembeeni huku mnamzungumza.

Kichwani hujiona mwanamke kamili, aliye na mwanaume asiye na ‘vimeo’ mitaani. Haya ni machache kati ya mengi ambayo kwa hakika hustawisha penzi.